Di rantau
Kita banyak bacarita
Mesir deng dia pe peradaban
Kepala gaya deng lidah logat Prancis
Kadang kong ada yang bilang
Jang pake paka dada kaya Belanda.
Bukan mo sombong-sombong
Kita ini paling dapat puji
Kalau so angka mitologi Yunani
Banyak bakunyah deng Eropa
Bangga kenyang deng Amerika
So nyaman bacarita orang-orang barat.
Paling lucu kong ada waktu luang
Nonton-nonton serial India
Apalagi Korea
Tarada bisa jaoh-jaoh itu
Dia pe tutup cuman tu K-Pop
Deng J-Pop
Sampe tiktok tutup jandela kosan.
Tapi ngoni tau?
Pas libur itu hari
Kita lewat-lewat Tanjung Failonga
Dermaga sofifi sampe di kintal rumah
Baduduk lupa diri kata tabea masuk pintu
So lupa bala kayu taru di dapur
Atau paru kalapa pas papa suruh
Apalagi mama suru kasih panas air
Bikin popeda momasa kuah kuning deng bubara
Kita bingung-bingung sasandiri
Bagaimana mo biking barang ini?
Pojok Halmahera, 07 Juli 2022
